Gjermania ka qënë për Shtetet e Bashkuara njëri ndër aleatët më të besueshëm qysh nga mbarimi i luftës së dytë botërore. E anasjellta është gjithashtu e vërtetë, teksa Gjermania e ka parë Amerikën si aleatin më të rëndësishëm në botë, dhe një mik ku mund të mbështetej. Por gjërat nuk janë më si më parë. Udhëtimin në Europë, zoti Trump e ka quajtur të vështirë por të suksesshëm. Ndërsa Merkel nga ana e saj u tha mbështetësve në një takim elektoral se “kohët kur mund të mbështeteshim plotësisht tek të tjerët kanë ikur”, me shumë gjasa, e kishte fjalën për Shtetet e Bashkuara, dhe Britaninë.
Presidenti Trump ka lajmëruar se këto ditë do të shpallë tërheqjen (apo jo) të ShBA-ve nga Marrëveshja e Parisit, e cila arriti dakordësinë e mbi 200 vendeve për të luftuar ndryshimet klimaterike. Ndjekësit e politikës amerikane thonë se vendimi është marrë tanimë dhe Trump vetëm po pret ta njoftojë - ShBA do dalë nga marrëveshja arkitekte e së cilës ishte ajo vetë. Ky mund të ishte hapi i parë i madh drejt kthimit nga vetja si filozofi pushteti, “America First”. Gjermanët i shohin këto lëvizje si heqje dorë nga roli i liderit dhe garantuesit të rendit global, që ShBA ka mbajtur gjithë këto dekada.
Trump ka qënë shumë kritik ndaj Europianëve, gjatë fushatës, por edhe gjatë vizitës. Gjermaninë e ka quajtur “të keqe, shumë të keqe” kur fliste për surpluset e saj tregtare, dhe nuk i ka kursyer kritikat ndaj vendeve të për mosshpenzimin e 2% të PPB-së kombëtare për ushtrinë, NATO-n. Gjermania nga ana e saj ka premtuar se do ta arrijë pragun e kërkuar deri në vitin 2024. Kjo është veçanërisht e vështirë në Gjermani, ku publiku e sheh me shumë skepticizëm militarizimin, për shkak të historisë.
Me pak fjalë, aleatët e shkëlqyer deri dje, nuk janë më në të njëjtat kushte. Gjërat po ndryshojnë midis ShBA-ve, Gjermanisë dhe vendeve të tjera perendimore, të cilat deri dje përfaqësonin një pol të bashkuar vlerash humane dhe demokratike. Bota nuk është më ajo e pak viteve më parë, ku Shtetet e Bashkuara udhëhiqnin dhe të tjerët ndiqnin. Për momentin duket si një ecje e paorganizuar, ku ca shkojnë në njërin drejtim, dhe të tjerët në një tjetër.
:
