Sot në Kuvend, Kryeministri Rama e ka akuzuar kryetarin e PBDNJ, Vangjel Dule se po përpiqet të pengojë integrimin, ndërsa i ka quajtur pa kuptim deklaratat e politikanëve grekë. Tonet, që janë ashpërsuar sot, midis kryeministrit dhe fqinjëve vijnë si pasojë e prishjes së 18 objekteve në Himarë, të cilat Dule i quan selektive në dëm të minoritetit grek, ndërsa Rama i konsideron asgjë, krahasuar me mbi 9000 objektet që janë prishur e do prishen.
Por Dule e akuzon Kryeministrin se po lejon grabitjen e qëllimshme të pronave të komunitetit minoritar grek në Himarë. Duke vepruar me paligjshmëri, e duke i kujtuar “sarajet e Qeparoit”, një hotel ndërtuar nga të afëm të Koço Kokëdhimës në breg të detit, mbi të cilat vazhdimisht ka patur akuza për shkelje dhe mosveprim të shtetit. Por këto akuza kryeministri nuk i pranon, duke thënë se ata në Himarë janë shqiptarë, dhe jo grekë, e duke cituar në mbyllje Petro Markon nga “Retë dhe Gurët”, mbi këngët e vajit, shqipe të krahinës.
Debati i sotëm në kuvend, i ngjashëm me ata nëpër forume online, ka marrë formën krahasuese kur kryeministri pranuar ndihmën e familjeve greke ndaj emigrantëve shqiptarë, por duke theksuar, se edhe ne, u kemi dhënë bukë pas luftës Italo-greke. “Pse duhet të mërziten fqinjët tanë kur unë them se në një periudhë të caktuar në Athinë flitej shqip? Kur mua nuk më vjen keq fare kur thuhet se në Himarë flitet greqisht. Këto nuk do ta bëjnë kurrë Athinën një qytet shqiptar dhe as Himarën kurrë një qytet grek. Iku koha kur na ndërronin emrin. Në Himarë do këndohet shqip”, ka thënë Rama.
Top Channel ka një kronikë këtu.
…
